البحث المطلوب من طلاب 3 ابتدائي وحتى 2 اعدادي

البحث المطلوب من طلاب 3 ابتدائي وحتى 2 اعدادي

 كل ما تريد معرفته عن مشروع البحث المطلوب من طلاب 3 ابتدائي وحتى 2 إعدادي + تحميل بحث استرشادي

هاااام للطلاب والمعلمين وأولياء الأمور . وتحميل ملف بحث الطلاب جاهز للطباعة . وما الفرق بين المكتبة الرقمية - والمنصة الإلكترونية .

أولا: ماذا يعني مشروع البحث المطلوب من طلاب صفوف النقل الذي يعد بديلا للامتحانات؟

الإجابة: مشروع البحث ده هيكون من خلال منصة إلكترونية هتطلقها وزارة التعليم نهاية شهر مارس الحالي، للتواصل بين الطلاب والمعلمين كما لو كانوا موجودين في المدرسة. بمعنى إن المنصة دي هتكون عبارة عن فصول دراسية، كل معلم هيكون مسؤولا عن طلابه اللي كان بيدرس لهم في الفصل قبل توقف الدراسة، وهيكون على هذه المنصة شرح للدروس والإجابة عن أسئلة الطلاب وإنشاء مشروع البحث عن طريق الرابط: https://edmodo.org

ثانيا: إزاي يدخل الطالب والمعلم على المنصة؟

الإجابة: سوف يتم عمل حساب على المنصة لكل معلم وعمل حساب آخر لكل طالب (زي حساب الإيميل كده)، وهيتم إرسال كود الفصل الإلكتروني للطلاب بمعرفة كل معلم مادة، بحيث يدخل الطلاب على نفس الكود ويلاقوا نفسهم مع بعض داخل الفصل وبعدين يدخلوا ويتبادلوا مواد الشرح.

ثالثا: ما هو مشروع البحث؟

الإجابة: مشروع البحث المطلوب من كل طالب عبارة عن أسئلة هتكون موجودة على المنصة الإلكترونية، والأسئلة دي مختلفة عن أسئلة الامتحانات العادية، بمعنى أن طبيعة السؤال هتخلي الطالب يجاوب على معظم دروس المنهج، سواء إللي درسها الطالب قبل توقف الدراسة أو حتى بعدها.

مثال ذلك: في مادة العربي هيكون أحد أسئلة المشروع البحثي (اكتب موضوع عن كذا يتضمن عدم وجود أخطاء نحوية ولغة عربية سليمة وصياغة بلاغية). والهدف من السؤال ده معرفة مستوى الطالب في النحو والبلاغة وسلامة اللغة العربية نفسها.

مثال تاني: في مادة الجغرافيا هيكون أحد أسئلة المشروع البحثي (ما أهم الأنهار الموجودة في قارة كذا وعلاقاتها ببعضها وفوائدها) والهدف من السؤال ده معرفة مستوى معرفة الطالب بجزئية هامة للغاية في مادة الجغرافيا.

وهيكون فيه سؤالين أو ثلاثة من النوعية دي في كل مادة، تتطلب الإجابة عليهم إن الطالب يبحث في المنصة الإلكترونية ويتصفح كتاب المادة والفيديوهات المنشورة عليها وكلها عبارة عن شرح بسيط وسهل للمنهج، وكمان الطالب هيبدأ يتعود على البحث عن المعلومة من أكثر من مصدر.. زي كتاب الوزارة أو فيديوهات شرح المنهج أو غيرها، وكلها موجودة على المنصة.

رابعا: ماذا بعد أن ينتهي الطالب من مشروع البحث؟

الإجابة: هيقوم كل طالب بإرسال مشروعه إلى المعلم الخاص به على المنصة الإلكترونية ليتم تقييم مستواه ومنحه شهادة نجاح ينتقل بها إلى الصف التالي.

خامسا: لماذا تتمسك وزارة التعليم بأن يقوم الطالب بعمل مشروع بحث؟

الإجابة: بعد قرار تعليق الدراسة والخوف على الطلبة إنها تروح المدرسة، وبعد إلغاء الامتحانات الترم التاني. كان لازم يكون في وسيلة تخللى الطالب يذاكر المنهج اللي باقي لأن الطالب لو استسهل وفكر نفسه إنه خلاص نجح بدون ما يذاكر أو يمتحن هيكون عنده مشكلة كبيرة جدا السنة الجاية، ومش هيكون قادر يفهم المنهج.

أوضحها لحضرتك أكتر : منهج 3 ابتدائي مثلا مرتبط بمنهج رابعة ابتدائي، وطالما إن الطالب مكملش منهج 3 ابتدائي هيكون عنده أزمة كبيرة في فهم منهج سنة رابعة، علشان كده لازم ولابد إنه يخلص منهج 3 ابتدائي مذاكرة وفهم قبل ما يروح رابعة.

أوضحها لحضرتك أكتر وأكتر: المفروض أن كل سنة دراسية المفروض يخرج منها الطالب بمستوى معين. ولأن الدراسة توقفت والطلاب مش هيمتحنوا كان لازم يككون فيه بديل يخليهم يذاكروا ويكملوا باقي المنهج لأن لو ده محصلش مستوى الطالب هيتأثر جدا في السنين اللي جاية.

مثال تالت أكثر توضيحا: هو ينفع الطالب يحل مسائل حسابية في الرياضيات في الصف الرابع الابتدائي، وهو لم يدرس جدول الضرب في 3 ابتدائي؟. أنا بديك مثال مش أكتر.

ولو ده حصل هيكون عنده نقص شديد في الفهم. لأن كل منهج بيكمل المنهج اللي بعده، وبالتالي قررت وزارة التعليم تخلى كل طالب يعمل مشروع بحث علشان يفضل يذاكر المنهج المطلوب بتاعه ومش يتعامل مع الموضوع على إن السنة الدراسية خلصت ونجح من غير ما يمتحن.

علشان كده: هيكون فيه منصة إلكترونية وقنوات تعليمية وفيديوهات كتير جدا المعلمين بيشرحوا فيها باقي المنهج بحيث يكمل الطالب المنهج كأنه كان في المدرسة بالظبط، أو كأنه كان في درس خصوصي.

سادسا: كيف ندخل على المنصة الإلكترونية ونقوم بعمل مشروع بحث ولا يوجد لدينا باقة إنترنت؟

الإجابة: اتفقت وزارة التعليم مع وزارة الاتصالات على توفير شرائح محمول بدون تكلفة أو باقة إنترنت تتيح الدخول على المنصة الإلكترونية وكل المواقع التعليمية التابعة لوزارة التعليم مجانا.

سابعا: ماذا لو تأخر الطالب عن تقديم مشروع البحث عن الموعد الذي حددته وزارة التعليم يوم 2 مايو المقبل؟

الإجابة: سوف يكون هذا الطالب مجبرا أن يدخل العام الدراسي الجديد مبكرا قبل زملائه بأسبوعين، حتى يتمكن من دخول امتحان يؤهله للصف الأعلى. وهذا يعني أن مشروع البحث إجباريا وليس اختياريا.

الخلاصة.. أولياء الأمور والطلاب حاليا قاعدين في البيت، وبدل ما يقضي الطالب وقته في حاجات ملهاش لازمة، المفروض يكمل المنهج المطلوب منه حفاظا على مستواه التعليمي السنة الجاية.

باختصار يا جماعة.. الموضوع ده لمصلحة ولادكم أولا وأخيرا.. ولادكم محتاجين كل معلومة وكل درس في المنهج.. عندك فيديوهات وعندك منصة إلكترونية بتشتغل من غير باقة إنترنت وعندك قنوات تعليمية، لو عايز مصلحة ابنك بجد شجعه يكمل المنهج ويعمل مشروع بحث علشان متقعش منه حاجات السنة الجاية.

بلاش تخللي ابنك يكون عنده نقص في فهم نظرية علمية أو مسألة رياضية أو معلومة تاريخية أو جغرافية.. المنصة الإلكترونية هتبدأ كمان 10 أيام ومش هتحتاج منك كولي أمر إلا إنك تقتنع إن اللي بيتعمل ده لصالحه.. هتقوللي معنديش كمبيوتر هقولك فيه شريحة موبايل بدون تكلفة هتدخل بيها.. هتقوللي معنديش كمبيوتر هقولك خللي ابنك يستخدم موبايلك.. المهم تقتنع إنك مسؤول عن إن ابنك يروح السنة الجاية المدرسة وهو فاهم المنهج اللي اتلغت امتحاناته.. يارب أكون قدرت أشرح لحضراتكم كل شيء.. وجاهز لأي سؤال فيما يخص الصفوف من 3 ابتدائي حتى 2 إعدادي.
****************************
الفرق بين المكتبة الرقمية والمنصة الإلكترونية
المكتبة الرقمية
https://study.ekb.eg
وهي مكتبة إلكترونية بجانب بنك المعرفة المصري "EKB" لمساعدة الطلاب على المذاكرة تضم مختلف المناهج الدراسية و للحصول على معلومات ومواد تعليمية وللمساعدة في عمل الأبحاث والمشروعات وسيتم في الأيام القادمة رفع فيديوهات تعليميه لكل المراحل عليها.

أما المنصة الالكترونية
https://edmodo.org
فهي للتواصل أون لاين بين الطلاب والمعلمين .
كما لو كانوا متواجدين في المدرسة، وسيتم من خلالها متابعة شرح الدروس والإجابة عن أسئلة الطلاب وإجراء امتحانات online لقياس مدى معرفه الطالب بالمعلومات التي وصلت له من المعلم .
حيث سيتلقى الطالب من معلمه في الفصل الكود الخاص به للدخول إلى الفصل الافتراضي الخاص به لمتابعة التواصل مع معلم الفصل إلكترونيا" .ويقوم الطالب في نهاية الفترة بعمل بحث (مشروع) لكل مادة على المنصة الإلكترونية، وسيكون متاحًا للطلاب التواصل مع معلم الفصل لمساعدته في تنفيذ البحث في خلال شهرين من اليوم .

بحث استرشادي:

لتحميل ملف بحث الطلاب pdf جاهز للطباعة من هنا

https://drive.google.com/uc…